5 Dec
2010

Memoria Anual

Como cada ano nestas datas viramos a vista cara atrás comprobando as actividades realizadas, os quilómetros percorridos, e tamén os momentos compartidos durante todo o 2010.

Neste ano destacamos o amplo programa anual realizado desde Febreiro a Decembro, o proxecto Xacobeo MMX e as participacións dos ciclistas de Ultreia en distintas competicións de varias modalidades  como o maratón btt, probas cicloturistas de bicicleta de estrada ou na dificil especialidade do descenso.

Se queres lembrar onde e cando pedaleaches descarga este arquivo adxunto:

MEMORIA ULTREIA 2010

25 Nov
2010

Novas Breves…

O vindeiro domingo podedes participar na marcha “Conquista das Torres de Altamira” con saida as 10:30 h. dende a Ferradura. Será a derradeira marcha programada desta temporada. Podedes consultar máis información sobre ela na sección AS NOSAS RUTAS.

Non por falta de actividades programadas deixaremos de sair nesta época…Mantemos os seguintes horarios de saidas Sen Determinar:

SABADOS: 10:00 h.

DOMINGOS e FESTIVOS: 10:30 h.

Proximamente no mes de decembro celebraremos a ASAMBLEA ANUAL de socios pero xa indicaremos hora e lugar…de momento a seguir pedaleando.

13 Nov
2010

Monte XESTEIRAS

ONDE  ?????

O Pico XESTEIRAS é o principal cumio dos montes da Terra de Santiago. Cos seus 716 metros  de altitude sobre o mar é o punto máis alto das montañas costeiras de Galicia. Se trazáramos unha liña imaxianaria entre Tui e Betanzos comprobaríamos que non existe á esquerda unha altitude superior a do Xesteiras.

E unha formación de granito co cumio redondeado atopándose na provincia de Pontevedra e compartindo superficie cos concellos de Cuntis, Valga e Pontecesures.

A súa proximidade ó mar e o encintado que lle fan os vales fluviais  próximos fanno sobresair sobre o seu entorno próximo. Claramente visible desde o Meda e tamén doado recoñecelo á nosa dereita  cando viaxamos pola autoestrada entre Caldas  e Compostela.

COMO SUBIR ?????

Son varios os itinerarios que por medio de pistas forestais nos poden levar ata o seu punto máis alto.

A ruta cicais a  máis levadeira é a que sae  de Cesures a pesares de partir do nivel do mar.  Sube un primeiro escano cara o Mte. dos Salgueiros  cubrindo   320 metos de desnivel e cunha pendente media do 3,71 %. Superada esta dificultade o itinerario transcurre por un longo trazado de case 10 km para arrodear o curso superior do rio Valga, transitar perto do santuario dos Milagres de Requián e realizar o achegamento ata o lugar de Fonte Magán.  A partires deste lugar a pendente increméntase progresivamente ata acadar ó 6,3%.  Chegado ó cruzamento chamado Curva dos Corvos a montaña impón o seu dominio sobre o ciclista pois ata o cumio restan 2,5 km cunha  media do 10,6 % e con tramos que chegan o 13 % de pendente como o que pasa ó   pé do gran penedo chamado Pedra da Aguia.  Se as condicións da superficie da pista son favorables para unha boa tracción superaremos este crítici paso e tan só quedarán uns centos de metros para coroar este coloso despois de 20 quilómetros de pedaleo continuo.

Existen outras rutas que,  partindo de Compostela,  dirríxense cara o Xesteiras ainda que  todas   deben atravesar o río Ulla. Tanto se o facemos  por Sinde ou por Pontevea coincidiremos  neste último tramo  coas dificultades engadidas  de vernos na necesidade de superar cortalumes desmontados da nosa máquina ou rodar máis tramos sobre o asfalto.

QUE  BONITO !!!!!

Desde o cumio do Xesteiras, a pesares da proliferación de antenas de comunicación, podremos admirar a Ría de Arousa enmarcada pola Serra do Barbanza e o Monte Xiabre. A súa esquerda chegaremos a divisar A Illa de Ons na boca da Ría de Pontevedra se o día está despexado. Mirando o Norte observaremos o cumio do Meda, a cidade de Compostela e a súa dereita a inconfundible silueta do Pico Sacro.

Tamén durante a ascensión podemos realizar paradiñas naqueles puntos de interese que nos permitan ademáis  recuperar folgos: O Petroglifo de Pedra da Serpe nas proximidades da aldea de Os Vilares, o Santuario de os Milagres de Requián ou xa na baixada as fervenzas de Raxoi.

Animádevos a participar nesta clásica ascensión ó “top -ten” dos Montes da Terra de Santiago pois non quedaredes defarudados e seredes considerados como uns auténticos ciclistas experimentados…

Información da data e lugar da saída.

27 Out
2010

PROGRAMA de Novembro 2010

Chegado o Outono é o momento ideal para disfrutar do noso entorno máis próximo cabalgando sobre dúas rodas e consolidar así a numerosa participación de ciclistas das últimas saidas.

O primeiro de mes daremos unha volta polo veciño concello de Teo enlazando algúns lugares de interese como: Petroglifo de Cornide, Pedra Escorredía, Fervenza do Río Tella para regresar a Compostela polo itinerio da Batalla de Cacheiras.

O domingo día 7, saindo da cidade polo Camiño de Fisterra seguiremos desde Bartamiráns a frase da cantiga popular: “POLO SAR ABAIXO VAI..”  e regresaremos polo Camiño Portugués.

O día 14 sairemos de Compostela con rumbo Norte para chegar o ALTO da MEDORRA no Concello de Trazo a través de pistas de fácil rodadura e sen dificultades montañosas.                                                

Quen non subiu ó MONTE XESTEIRAS non pode presumir de ser un ciclista experimentado…Escalarémolo o terceiro domingo de Novembro coa opción máis doada de iniciar o percorrido desde Pontecesures ou facelo desde Santiago.

Rematarémolo o mes coa clásica saida programada para o domingo 28: CONQUISTA das TORRES de ALTAMIRA que desde Compostela achéganos a este magnífico mirador sobre a bisbarra de  A Mahía.

Máis Información no Arquivo Adxunto: NOVEMBRO

17 Out
2010

CAMIÑO FRANCES

O CAMIÑO  FRANCES é a vía xacobea do solpor. Amósase coma a principal das que levan á cidade do apóstolo pois xa desde o século XI era a máis transitada.

Desde PORTOMARIN, a beira do Miño, o camiño avanza cara a aldea de HOSPITAL da CRUZ sempre costa arriba. Varios camiños recuperados discurren paralelos á estrada. Na paisaxe predominan os montes de piñeiros e toxeiras.

Entre o Alto de LIGONDE (756 m.) e o do ROSARIO transcurre este cómodo tramo antes de chegar a PALAS de REI..

PALAS de REI era o comezo da decimoterceira e última etapa do Códice Calixtino. Desde as Terras da Ulloa o Camiño penetra na Terra de Melide por unha gándara erma. Mediante suave transición entramos na Galicia Occidental pero entre MELIDE e ARZUA constitue un auténtico rompepernas por ter que cruzar os valiños tranversais dos ríos que verten o Ulla próximo.

Entre ARZUA e STA. IRENE, sobre un firme maioritariamente homoxéneo, o camiño vai presentar un mellor estado que ata agora, este feito que favorecerá a marcha coincide cunha suavización dos contartes no perfil con valgadas e cotas menos acusadas que as precedentes, sempre entre montes e pradería.

O tramo ata LAVACOLLA é un dos máis alterados con respecto ó seu trazado histórico. Remata co duro ascenso á cima da BARREIRA por atoparse coa infranqueable pista do areoporto. Desde aquí o camiño non resulta nada recomendable para os que queiran gozar coa paisaxe. Próximo esta o MONXOI onde pódese seguir a vella tradición de facer carreira por ver quen é o “Rei” da comitiva. Ata a praza do OBRADOIRO tan so resta tramo urbano para finalizar a ruta.

Perfil do CAMIÑO FRANCES da 13ª atapa

Sitios que che interesan

Destacamos

As nosas Rutas

Wikiloc